საგამოძიებო სამსახურის განცხადება
21.12.12 11:28
`თელასის` საქმესთან დაკავშირებული მასალები გამოაქვეყნა გვიან ღამით ფინანსთა სამინისტროს საგამოძიებო სამსახურმა. სწორედ ეს მასალები გახდა 6 ყოფილი მაღალიჩინოსნის დაკავების ერთ-ერთი საფუძველი.
დოკუმენტების მიხედვით, `თელასის` საქმეზე გამოძიება 2012 წლის 8 ნოემბერს დაიწყო და ამის მიზეზი გიორგი ნემსიწვერიძის მიერ შ.პ.ს. "ელ-ენდ-ეფ სერვისის" შექმნა გახდა. ეჭვი იმ მიზეზით გაჩნდა, რომ ამ კომპანიას არ ჰქონდა ჩატარებული არანაირი საქმიანობა, ანგარიშზე კი ერიცხებოდა მილიონი ლარი.
მასალებში ასევე გამოქყვენებულია ამონაწერი "ლიბერთი ბანკიდან", რომელზეც "ელ-ენდ-ეფ სერვისისთვის" თანხის ჩარიცხვის სქემაა გაშიფრული. საჯარო ხდება `თელასის` მიერ ამ კომპანიისთვის თანხის გადარიცხვის ქვითარიც, რომლის მიხედვითაც დასტურდება, რომ ჯერ კიდევ 2012 წლის აგვისტოში 450 ათასი ამერიკული დოლარი საკონსულატაციო მომსახურების საფასურად გადაირიცხა კომპანიის ანგარიშზე.
გამოძიებას მტკიცებულების სახით აქვს გიორგი ნემსიწვერიძის მიერ "ლიბერთი ბანკიდან" თანხის გატანის ქვითარიც, რომლითაც დასტურდება, რომ ნემსიწვერიძემ ბანკიდან ხელზე გამოიტანა მილიონ 184, 950 ლარი, რომელიც, მოგვიანებით, ნიკა გვარამიას გადასცა. მასალებში გამოქვეყნებეულია ასევე მოწმეთა დაკითხვის ოქმები. მათ შორის თელასის სამეთვალყურეო საბჭოს წევრის თემურ ჭინჭარაულის, ენერეგეტიკისა და ბუნებრივი რესურსების მინისტრის მოადგილის მარიკა ვალიშვილის, სააქციო საზოგადოება "თელასის" მაღალი თანამდებების პირების, ასევე შ.პ.ს "ფიუჩერ პროდაქტს კომპანის" თანამშრომლების და სხვათა ჩვენებები.
გამოძიების მტკიცებით, კონკრეტულად "ფიუჩერ პროდაქტს კომპანის" ფინანსური მრჩევლის ქეთევან ბადაშვილის ჩვენება ადასტურებს, რომ ის ნიკა გვარამიას უშუალო დავალებით დაეხმარა ნემსიწვერიძეს 2012 წლის აგვისტოს ბოლოს "ლიბერთი ბანკიდან" მილიონ ნახევარი ლარის გამოტანაში.
მოგვიანებით, გამოტანილი თანხის ნაწილი - 300 ათასი ლარი ნემსიწვერიძემ კვლავ ანგარიშზე დააბრუნა. გამოძიება ეჭვობს, რომ შ.პ.ს."ელ-ენდ-ეფ სერვისის" დაფუძნება დაჩქარებული წესით ერთადერთი მიზნით მოხდა, რათა გამარტივებულიყო ფულის გათეთრება. ამ ეჭვის დადასტურების საფუძველს კი გამოძიებას შ.პ.ს. "ფიუჩერ პროდაქტს კომპანის" იურისტის თამარ ნოზაძის ჩვენება აძლევს, რომელიც აცხადებს, რომ ეს კომპანია მან უშუალოდ გვარამიას მითითებით, დაჩქარებული წესით ნემსიწვერიძესთან ერთად დაარეგისტრირა.
საგამოძიებო სამსახური ავრცელებს ასევე სამხარაულის სახელობის ექპერტიზის ბიუროს დასკვნას, რომლითაც ადასტურებს, რომ "ელ-ენდ-ეფ სერვისის" მიერ თელასში ჩატარებული კვლევა, ფაქტობრივად, 2012 წლის მაისში უცხოური კომპანიის მიერ ჩატარებული კვლევის იდენტურია, რითაც მტკიცდება, რომ მას არანაირი სამუშაოები არ ჩაუტარებია და "ელ-ენდ-ეფ სერვისმა" მხოლოდ გადმოთარგმნა ამ უცხოური კომპანიის დასკვნა, რომელსაც `თელასმა` სამუშაოს შესრულება მარტში დაუკვეთა.
|
