მთავარი პროკურორი განმარტებებს აკეთებს
28.01.13 15:11
საპარლამენტო უმცირესობის ზოგიერთი წევრის წინააღმდეგ, საჭიროების შემთხვევაში, შესაძლოა სისხლის სამართლებრივი დევნა დაიწყოს - ამის შესახებ მთავარმა პროკურორმა განაცხადა. არჩილ კბილაშვილი ასე გამოეხმაურა უმცირესობის რამდენიმე წევრის გადაწყვეტილებას - არ გამოცხადებულიყვნენ დაკითხვაზე და მხოლოდ საჯაროდ გაეცათ პასუხი გამოძიების შეკითხვებზე. მთავარმა პროკურორმა ამ საკითხთან მიმართებით კანონმდებლობით გათვალისწინებული ღონისძიებები განმარტა.
`ერთადერთი უფლება, რასაც მათ კანონი ანიჭებს, არის - არ გათქვას ისეთი ინფორმაცია, რაც მისი, როგორც პარლამენტის წევრის საქმიანობას უკავშირდება. კითხვები გვაქვს პარლამენტის წევრობამდე საქმიანობასთან დაკავშირებით და აქედან გამომდინარე, მათ ევალებოდათ გამოცხადებულიყვნენ დაკითხვაზე. ამ შემთხვევაში უკვე არსებობს წინაპირობა იმისა, რომ პირი, რომელიც ამ ვალდებულებას არღვევს, მიცემულ იქნეს სისხლის სამართლის პასუხისგებაში და მის მიმართ დაიწყოს დევნა. იუსტიციის მინისტრს კანონი აძლევს უფლებას, პარლამენტის თანხმობით დაიწყოს პარლამენტის წევრის მიმართ დევნა. მას შეუძლია, ეს საკითხი დააყენოს დღეს, ხვალ, ანუ მაშინ, როცა ამას საჭიროდ მიიჩნევს,`- აცხადებს მთავარი პროკურორი.
|
